Get Connected!

Hi Ina

Jou tannie het ongelukkig 'n slegte ervaring met haar oog gehad en dit is altyd jammer om van te hoor. Dit is moeilik om spesifieke advies te gee angesien ek nie al die informasie het nie.

'n Bloedklont kan een van twee reaksies in die oog veroorsaak.

1. Dit blokkeer een van die are (vervoer bloed na die oog) en die retina na die bloedklont afsluitings punt kry nie suurstof nie. Die retinale weefsel 'versmoor' dus en sterf af.
2. Dit blokkeer een van die vene (vervoer bloed weg van die oog) en die bloed dam op binne in die aar totdat die veen bars en begin bloed lek. Die effek is dan bloeding wat plaasvind binne die retinale weefsel. Dit kan vergelyk word met 'n beroerte binne die brein.

Die "Fluorescein angiography" wat die oog spesialis gedoen het maak dit makliker on te visualiseer waar die skade op die oog plaasgevind het.



As die foto dieselfde lyk as 'n nat Makulere Degenerasie foto aanvaar ek dat die sentrale gedeelte van die oog aangetas is en dat jou tannie moontlik 'n sentrale veen afsluiting gehad het in teenstelling met 'n tak afsluiting. Die sentrale veen afsluiting gaan ook baie gepaart met makulere edeem.



Voordat 'n bril opgemaak word sal dit goed wees om eers 'n visuele veld toets te doen. Gewoonlik met 'n sentrale veen afsluiting verloor die oog sy visie volledig en is die oog dus blind. Verskeie studies toon egter dat Avastin wel 'n klein hoeveelheid van die gesigsveld kan terug wen. Dit sal dus baie hulpvol wees om te bepaal of enige sig herwin is en presies watter gedeelte van die gesigsveld herwin is.

Jou tannie noem dat sy in die buitekant van die raam vaskyk wat vir my laat dink dat sy wel haar periferale gesigsveld behou het.

Ek sal nie dat sy die oog se bril lens totaal swart maak nie. Die verlies in visuele stimulis kan maak dat die oog volledig onderdruk word wat mettertyd kan lei na 'n volledig ambliopiese oog (lui oog). Die effek is dan 'n oog wat in of uitdraai (skeel oog).

Dit is beter on die periferale sig te behou wat die visuel brein sal toelaat om die twee oe te laat saamwerk en dus binokelere sig te behou. As sy in die raam vaskyk kan dit 'n aanduider wees dat die raam te klein is en moet sy eerder of 'n groter of 'n raamlose raam kies.

Ek sal versigtig wees om weer na 'n multifokale lens te kyk vir die volgende bril. As die oe nie goed saam werk nie is die normale v-patroon (konvergensie) wat die oe volg om naby en ver te kyk abnormaal. Die multifokaal lens is ontwerp om die normale konvergensie patroon van die oe te volg en 'n abnormale konvergensie patroon gaan maak dat sy nie normaal deur die multifokaal lense gaan sien nie al is die voorskrif korrek. Die oogkundige wat haar bril maak sal moet kyk of haar konvergensie patroon gaan werk vir die multifokaal, hy/sy kan die 'mirror test' doen om dit vastestel.

Vir die res moet sy so 'n bietjie vasbyt, die visuele brein sal metter tyd die 'nuwe' visie aanleer. Dit is baie normaal vir mense wat onmiddelik hulle sig in een oog verloor om van balans af te voel as gevolg van die verlies van diepte persepsie. Hulle is ook baie geneig om aan die begin in meubels of teen die duurkosyn vas te loop of om water mis te gooi in die beker as hulle koffie of tee maak. Metter tyd 'leer' die brein om met net die een oog diepte persepsie beter te skat en dan gaan dit beter!

Sterkte en ek hoop dit gaan gou beter met haar
Read More...